How to excel in university

كلنا كان عزيز علينا نتفرجو ف الرسوم المتحركة ملي كنا صغار. و كلنا دوزنا أوقات أكثر من رائعة مع مركز الزهرة و الدبلجات ديالو فقناة سبايستوون. شخصيا، الرسوم المتحركة آثرت على الحياة ديالي و باقا كاتأثر فيها. وحدة من أروع الأشياء لي شفت وأنا صغير هي واحد السلسلة (بلا شك تانتوما غادي تعرفوها) سميتها صقور الأرض. صقور الأرض سلسلة كاتعاود القصة ديال الحرب لي كانت نايضة فالصين القديمة بين الممالك الثلاث ديال ديك الفترة. لي خلاني نتسحر أكثر بهاد السلسلة هو واحد الشخصية إسمها برهان. الشخصية مستلهمة من شخصية حقيقية تعرفات بإسم Zhuge Liang. هاد الشخصية تعرفات بدهائها و قدرتها الهائلة على التخطيط الإستراتيجي و الحربي. فهاد المقال غادي نشوفو جميع كيفاش نستعملو بعض النصائح ديال Liang باش نجحو فحياتنا الدراسية. حيتاش فالنهاية، المدرسة ماهي ايلا حرب طويلة مع الذات ديالنا.

استدرج السبع من المخبأ ديالو

هاد القاعدة حطها Liang فالفصل الخاص بالهجوم على العدو. الخلاصة ديال هاد النصيحة هي عمرك تجابه العدو راص فالراص و خصوصا ايلا الكان العدو قوي. و بمصطلحات الكرة. ماتلعبش معاه فملعبو. جرو عندك للمستنقع ديالك و للملعب ديالك ومرمدو. بعدو على منين كيستمد القوة ديالو. هاد النصيحة ممكن تتطبق فالمدرسة و الكلية. الأستاذ هنا، هو السبع و المخبأ ديالو هما المعلومات لي عندو على الموضوع لي كيقري. نتا كطالب/محارب خاصك تستدرج من الأستاذ غاع المعلومات لي عندو و خاصك تهبطو من داك البرج العاجي لي جالس فيه. ماتفهموناش غلط، إحترام الأستاذ ديالك واجب و مفروض. لاكن لا عيب فكثرة الأسئلة. ماحدك مافاهمش سول و عاود حتى تفهم. و خلي ال Role model ديالك هو ديك الشخصية الكرتونية لي كانت كاتغني فسبايستوون و كاتقول:"لماذا؟....لماذا؟....لماذا؟....سؤال يراودني...."

إطعن بسيف ماشي ديالك

هادي المقصود بها فكتاب Liang هو أنك فالحرب حاول ما أمكن تستغل الموارد ديال شي حد آخر و ماتضيعش مواردك نتا. ديما ضرب بسيف ديال شي واحد اخر وخلي السيف ديالك نتا إحتياط. فالقسم ممكن نديرو الإسقاط ديال هاد القاعدة على واحد القضية مهمة. فالورقة ديال الإمتحان، عمرك تكتب بالموارد لي كاتعرف نتا. يعني بأسلوبك و المصطلحات ديالك و بأفكارك. كتب بأسلوب أستاذك و استعمل مصطلحات أستاذك و فكر بتفكير أستاذك. هاكذا ملي غادي يكون كيقرا، غادي يحس بداكشي مألوف ليه و غادي يرخف راصو بلا مايحس و ينزل الدفاعات ديالو أثناء التصحيح؛ شيئ لي غادي يضمن ليك نقطة مزيانة.

قلب على حلفاء بعاد و ضرب بيهم جارك

هنا Liang كان كيقصد بالحلفاء البعاد دول بعيدة. فالحرب ديالك مع الدولة الجارة، قلب على حلفاء من دول بعيدة واستعن بيهم على الجار ديالك العدو. فالقسم ممكن نطبقو هاد القاعدة من خلال المجموعات الطلابية. فبعض المرات، نتا بوحدك ما عندك حيلة ضد الأستاذ و الإمتحان؛ و يدك بوحدها ما كافياش. داكشي علاش بلاصت ما تحماق بوحدك، قلب على حلفاء/ طلبة لي يعاونوك و تعاونهوم. كثفو الجهود ديالكم من خلال تعلييم و مساعدة بعضياتكوم حتى تقوى شوكتكم كاملين و تمشيو واجدين للمعركة/الإمتحان.

هادو كانو ثلاث استراتيجيات، موخودين من عند أخطر داهية فالعالم الحربي Zhuge Liang. خودو بيهم فالحياة ديالكم الدراسية و طبقوهوم بذكاء. و كيف ما كانقول ديما:

The classroom is an arena and you are all gladiators, so kill or be killed