How to make the best out of Facebook

كيفاش تستافد من الفايسبوك

فالعالم الحالي ديالنا ولا إذا سمحتولي نسميه عالم الديجيتال ولا الإنسان معرض للعديد من الأشياء لي كاتنقص من الفعالية ديالو و كاتلهيه على الأشياء المهمة. غادي تافقو معايا كلكم اذا قلنا بلي الأغلبية ديال الأوقات لي كاندوزوها فهاد العالم هي اوقات خاوية من اي معنى و ما فيها لا فايدة و لا منفعة. ايه فعلا، تضياع لوقت شي مرات فحد داتو منفعة. الواحد كيخوي راصو من الهموم و كينقي ذاتو من السموم لي جمعها طيلة النهار سواء فالمدرسة او الخدمة او من الشارع. ما كاين ما حسن من ديك التكسيلة لي كانضربو فالعشية و نتسركلو فالفايسبوك من بعد يوم شاق و متعب. ولاكن اخويا المغربي و ياختي المغربية، الشيء إن زاد عن حده انقلب الى ضده. واخا ماعزيزش علينا هاد النوع ديال الحجج لي كيعتامد على البلاغة و الفصاحة بحق هاد المرة درنا استثناء نظرا لما فالجملة من صح و عبرة. و باش نحطوها ليكم واضحة بلا لف أو دوران، الفايسبوك خرج علينا. كنا ديما كانعتابرو اي حاجة ما كاتزيدش للإنسان قيمة سواء على المستوى الفكري او على باقي المستوات فماهي إلا عدو لازم يتستأصل قبل ما ينخر الجسد ديالنا لي حنا فحاجة ماسة ليه. الفايسبوك عندو العديد ديال الحسنات لي كيشفعو ليه أمام السيئات ديالو. و ربما خير دليل انك/ي حاليا كاتقرا فهاد المقال. ولكن، بالرغم من كثرة حسناتو، فايسبوك عندو قدرة هائلة على انه ي suck you in. كيجرك لعندو و ما كيخليكش تهرب. لهذا سيادنا جبنا ليكم بعض النصائح و الtips لي يمكن ليكم تستاعنو بيهم باش توضعو حد للجبروت ديال فايسبوك و تحدو من توغلو فحياتكوم. تبعو معانا.

اولا، صحابك و صحاباتك

الfriends فالفايسبوك ماكيشبهوش بزاف للfriends لي فالواقع. اصدقاء الفايسبوك كتار و الطريقة باش ختاريناهوم عشوائية شي شوية مقارنة مع اصدقائنا ديال الواقع. فالفايسبوك يكفي تشوف الصورة و تعجبك باش تقبل الطلب ديال الصداقة او ترسلو نتا بدورك. هاد العشوائية فالإختيار كاتخلي الfeed ديالك تعج بشتى انواع الأشخاص. كاين لي عزيز عليه الميمز و كاين لي عزيز عليه الماسق و ما بين هادو و هادوك كاين لي عزيز عليه التفاهة. نصيحتنا ليكم هي كتالي ماتخافش دير unfollow لأي واحد مخصر ليك الfeed بشي مصيبة ماتنفعك ما ضرك. لاحظ قلنا unfollow و ماشي unfriend. كاين عندنا ناس كانعرفوهوم فالواقع شي لي كيخليها ناقصة unfriend-يوهوم . داكشي علاش تانظيرو غير unfollow و نخرجو من باب واااااسع. عمرك باقي تشوفهوم فالfeed و فنفس لوقت باقيين عندك ف ليست ديال الأصدقاء. هذا كان القالب الأول.

ثانيا، نظم الfeed

القالب التاني لي ايخلي حياتك مزيانة فالفايسبوك هما الfriend lists . اللوائح ديال الأصدقاء هما واحد الخاصية زوينة فالفايسبوك و القليل ديال الناس لي عارفينها. يمكن ليك تخصص لائحة فالفايسبوك و تخصصها غير للناس لي كاتنشر أشياء مفيدة. مثلا غادي نقادو لائحة و نسميوها English learning . فهاد الائحة غادي نحط غير الناس لي كاتحط مرة مرة مواضيع عندها علاقة بتعلم اللغة الإنجليزية. الحاجة الواعرة فالfriend lists هي كيمكنوك تشوف الposts غير ديال الناس لي ختاريتي. يعني ملي تفعل الlist اتبدا تشوف فالfeed غير الناس لي نتا ختاريتي. مع الأسف الخاصية تلغات فالتطبيق ديال الهاتف بحق مزالة خدامة فالنسخة ديال الحاسوب.

ثالثا، سجل لحوايج المهمة

القالب التالث، هوا واحد الخاصية اخرى لي قليل فين كانستعملوها حتى هي. الخاصية بإختصار هيا خاصية save post. هاد الخاصية الجديد نوعا ما هي خاصية مهمة جدا واكاتخليك اكثر و ترتيبا. الخاصية كاتمكنك تسجل الposts لي عجبوك و تخليهوم من بعد ترجع ليهم. تقدر مثلا تسجل الڤيديويات ديالك بحال هاد الشكل:

Learning

History

Games

Tutorials

هاد الخاصية كاتخليك ترجع للposts لي طربوك و تستفهوم بطريقة زينة و نقية.

سيادنا هذا ما كان وصلنا لنهاية المقال. عارفين بلي المقال بعيد شوية علا الإنجليزية و إن كان كيقيسها شوية. بانلينا هاد الأمر مهم داكشي علاش تطرقنا ليه. نتمناو ينال ستحسانكم. غادي نخليو ليكم لتحت محموعة ديال الkeywords اذا بغيتو تتعمقو مزيان فكيفية استعمال هاد القوالب لي عاد وريناكوم. السلام.

Keywords

Save post, Friend lists, Unfollow vs Unfriend, restricted list