make the best out of the internet

كيفاش تستافد من الانترنت لتعلم اللغات

كان يا مكان في سالف العصر و الأوان، واحد السيد اسمو عدنان. عدنان رجل علم و عزيز عليه يكتب بالأقلام. صال و جال و تعلم يقرى و تعلم للحساب. عدنان تخصص فعلوم الإنسان و ولى يكتب على النفس و الشخص و الهوية والأديان. لكن فواحد النهار و عكس ما تخايل عالمنا الفنان، صادف معضلة من معضلات داك الزمان. و كان لازم عليه يسافر لليونان، ايلا بغا يلقى حل للمعضلة. في اليونان كانت مكتبة يقصدوها العلماء من كل مكان. من الشام، اليمن،  مصر و باقي البلدان. لاكن جرات الرياح عكس ما بغات باخرة القبطان؛ وعصفت ريح صرصارة غضرت بخونا عدنان و جلاتو للتلت الخالي وولى يدور حفيان؛ حالتو تشفي العديان.

حبس حبس حبس؛ اش هادشي؟ واش مابقيتوش كاتعلمو الإنجليزية؟ قلبتوها رمانة و برطال؟....ههههه لا لا اسيدي ماقلبناها والو. هاد القصة ديال عدنان فيها واحد الحكمة لي خاصنا كاملين كطلبة عِلم نديروها فبالنا. الحكمة و مافيها هي أنه شحال هادي، المعرفة كانت صعيبة و الى بغيتي معلومة وحدة خاصك الضرب الطريق وتسافر و تحفي صبابطك. حاليا، قليل فين كانوقفو نتأملو شحال حنا محظوظين و شحال حنا مبرعين. المعرفة دبا ولات على بعد نقرات قليلة من بعد ما كان خاصك تقطع على ودها البحور و تعبر الصحاري. دبا كاتبغي شي معلومة كانقلب عليها فشي محرك من محركات البحت بحال Google و فبضع ثواني كاتجبدها و تقراها بلا حتى شي مجهود. فهاد المقال غادي نهضرو ليكم شوية على كيفاش تستافدو من هاد القدر الهائل ديال المعلومات لي متوفرة لينا حاليا.

الغرض ديالنا كاملين هنايا هو تعلم اللغة الإنجليزية. إيوا علاش باقي عندك الphone بالفرنسية؟ علاش باقي عندك الحساب ديالك فالfacebook بالفرنسية؟ إيلا فعلا باغي تتعلم للإنجليزية، كانقتارحو عليك من دبا تبدل اللغة باش كاتعامل مع الإنترنت و الأجهزة الإلكترونية من الفرنسية للإنجليزية. تقدر تبان ليكم هاد الخطوة عادية، بحق تيقو بينا ملي نقولو ليكم بلي هاد الأشياء الصغيرة كاتلعب دور كبير من بعد. ملي غادي ترجع الfacebook بالإنجليزية غادي تعلم المعنى ديال كلمات بحال:

Share

Like

React

Love reaction

و زيد و زيد من الكلمات و العبارات لي غادي تحفضهوم دغيا بقوة ما كاتشوفهوم بزاف ديال المرات و غادي تنقص على راصك مجهود كبيييييير.

المعرفة دبا مرمية و تا واحد مابقا باغيها. شحال ديال الوقت كانضيعوه قدام الfacebook و باقي الsocial media platforms بلا مانستافدو منو حتا شي حاجة. حنا ماكانقولوش ليكوم قاطعو الsocial media و لاكن كان طالبوكوم على الأقل ايلا غادي ضيعو وقتك قدام المشاقف حاولة تنتقيو المحتوى لي كاتعرضو ليه. كاين بزاف ديال المواقع و الصفحات فالانترنت لي كاتقدم محتوى زوين، نقي، وتعليمي. مثلا، كل صباح ملي تفتح الwifi فالهاتف ديالك، بلاصت ما تدخل للfacebook و تتصادف مع شي post يخربق ليك الmood و يخلي نهارك من لول طالع مكفس، دخل لموقع ديال dictionnary.com لي فيه أتلقى معلومات خفيفة و مفيدة تزيدها فرصيدك المعرفي و تكبر بيها قدراتك اللغوية. دخل كذلك للBBC Learning English فين تلقى مقالات خفاف ضراف على مواضيع عندها علاقة بتعلم الإنجليزية. الموقع الثالث لي بغينا نقترحو عليكم هو ello.org لي هو عبارة عن موقع متخصص في دروس إنجليزية مسموعة. الدروس ممكن تسمع ليها مباشرة على الموقع زائد ممكن تشوف الscript ديال الaudio باش تبع معاه.

هادو كانو بعض النصائح لي ممكن يعاونوكم تستغلو وقتكم بطريقة أنجع على الإنترنت و ماتبقاوش غير ضيعو فالوقت. وديما تفكرو تمارة لي كان خاص عدنان يضرب باش يلقا معلومة وحدة بينما نتوما عندكم access لغاع داكشي لي محتاجين فماتضيعوش وقتكم فالخاوي.