How to overcome public speaking - part 1

فواحد التجربة، شدو جموعة ديال الناس وسولوهوم على المخاوف ديالهوم...مناش كيخافو و شنو الحاجة لي كاتخلعهوم بزاااااااف فهاد العالم. النتيجة كان من المفروض تكون على هاذ الشكل:

"كنخاف من الموت"

"كنخاف من السبوعة"

"كنخاف من العقارب والحناش"

هادشي لي كان متوقع...بحق الحقيقة كانت مختلفة تماما. الجواب ديال تقريبا الأغلبية كان كتالي:" كانخاف نهضر قدام الناس". اييه اسي، الناس كاتخاف تهضر قدام الناس كتر ما كاتخاف من السبوعة و الحيوانات المفترسة. و كيما ديما مانحتاجوش نمشيو بعيد باش نتأكدو بلي الخوف من الهضرة قدام الناس فعلا كاين. فكر غير فراصك و كيفاش ترددتي اخر مرة و فكرتي مزيان قبل ما تهضر قدام الناس. تفكر شحال من مرة ما هزيتيش صبعك نشارك عند الاستاذ/ة واخا كان عندك الجواب الصحيح. شفتي؟ راه هاد القضية كاينة نيت بصح. المهم وحيتاش نتوما عزاز علينا و حيتاش مصلحتكم كتهمنا، جبنا ليكم سلسلة ديال المقالات لي فيها غادي نحاولو نعطيوكوم حلول عملية لكيفاش تخطاو هاد المشكل و تحيدو منكم هاد الفوبيا. هي صعيبة بحق، تيقو بينا، ماشي مستحيلة. اذا، و دائما كيف ما كاتقول شميشة، نبداو على بركة الله.

اولا، علاش كاتخاف؟

اول حاجة خاصك ديرها، باش تحل هاد المشكل، هي تشوف بعدا شنو هو المشكل. إيه الخوف من الهضرة هو المشكل بحق منين جاي هاد المشكل؟ شنو السبب لي خلاك كاتخاف من الهضرة قدام الناس؟ واش المشكل فلغتك؟ زعما واش ماكاتعرفش تهضر مزيان هادشي علاش كاتفادا الكلام قدام الناس؟ أو ربما المشكل فشي تجربة سبق وقعات ليك؟ ربما ضحكو عليك من قبل شي مرة و من تمة تعقدتي و مابقيتيش باقي باغي تعاود تهضر قدام الناس. خاصك ضروري تحدد بالضبط علاش كاتخاف. حيتاش الطريقة الوحيدة باش تخطى المشكل هي الفهامة ديال المشكل. جلس مع راصك وفكر وأتأمل وقلب على السبب الرئيسي لي كيخليك تخاف تهضر قدام الناس. كلي غاتلقا السبب اتكون ديم الساعة درتي الخطوة الاولى ومستعد للخطوة التالية.

لقيتي سبب المشكل؟ ايوا خاصك تلقا ليه الحل

لنفترض أنك مثلا لقيتي بلي اللغة ديالك هي السبب الرئيسي لي كيخليك ماتهضرش قدام الناس. عدم تمكنك من اللغة الإنجليزية مثلا هو لي مخليك صاقر فالقسم و شاد على افكارك لا يهربو. هنا، راه خاصك اولد عمي تنوض و تخدم على لغتك. فايت شاركنا معاكوم بزاف ديال الطرق ديال كيفاش تحسنو من لغتكم ودبا هو الوقت فين تجبدو داكشي و تخدمو عليه. ناقص فالvocabulary؟ تفرج فالأفلام و المسلسلات. ناقص فالgrammar و القواعد عندك ضعاف؟ رجع للposts لي كانحطو وضرب عليهم طلة. قلب فيوتوب راه المعلومة غير مزاوطة دبا خاص غير لي يدير النفس و يجمعها. قلب على كيفاش تقوي مواطن الضعف عندك و المرة الجاية فالقسم ارى ماعندك و الأستاذ بكلمة ونتا بجوج.

الأخر بحالك بحالو؛ ولي ضحك عليك، ضحك معاه

وحدة من أهم الأسباب لي كاتخلينا نبقاو صاقرين هي الخوف ديالنا من الأخطاء. طورنا حساسية كبيرة من الأخطاء وولينا ماكانقدوش عليهم والخطأ ولى كيبان لينا بحال شي غول واقف مورانا كيساين غير ايمتا يضحك فينا العالم. شوف اخاي شوفي اختي، الخطأ شي حاجة لي عادية. كلنا كنخطؤو. المخير فينا كيزلق ملي كيبدا يهضر. راه الخوف من الضحك ديال الناس كاين غير فدماغك. تاحد مامسوق ليك. و بليل ملي كل واحد كيمشي لدارو، تاحد ماكيفكر فال"s" لي نسيتي ولا فالفعل لي ماعرفتيش تصرف.

العلاج بالصدمة؛ كبرها تصغار

شي مرات بقوة ما كاتخاف تجرب شي حاجة كاتبدا تبان ليك مستحيلة. بقوة ماكاتعطيها كتر من قيمتها ماكاتبقاش غاع قاد تخايل راصك كاديرها. داكشي باش العلاج بالصدمة يقد ينفعك. شنو هو العلاج بالصدمة؟ العلاج بالصدمة هو ملي كدير العكس تماما ديال الحالة ديالك. مثلا نتا كاتخاف من الهضرة قدام الناس، داكشي لي غادير فالعلاج بالصدمة. اتجمع عليك شي مجموعة ديال الناس و تبدا تدرب. كل مرة نفس القضية حتا يطير منك حس الخوف. المرة الجاية لي تجيك الفرصة تهضر قدام الناس نوض بلا ماتفكر. زعم ولي ليها ليها. ويلا غاع جاب الله و ماهضرتيش مزيان، هانية رجع جلس فبلاصتك بكل روح رياضية.

فالpost جايين انهضرو على حلول دقيقة اكثر بقاو على خط و ردو البال فالصفحة.