How to overcome the white paper curse.

فحلقة من الحلقات ديال الكابتن ماجد، بسام و الفريق ديالو فرضو واحد الحصار قوي على الفريق ديال ماجد. بقوة ما كان الحصار قوي بزاف، ماجد حس براصو بحال ايلا مسدود عليه فشي قفص. باش يتحرر من ديك اللعنة ديال بسام و صحابو كان لازم يفكر بطريقة خارج الصندوق. فيما يلي بعض الtips لي تقدر تعاونكوم تتحررو من لعنة الورقة البيضاء و تخلصو من داك القفص الوهمي لي كي شدكوم و ما كي خليكومش تحركو فالميدام بحرية.

داك الإحساس ديال عدم القدرة على الكتابة لي كاملين جانا فمرة من المرات هو فالحقيقة شي حاجة لي شائعة وكاطرا لبزاف ديال الناس. فهاد الحالة العجيبة، الورقة البيضاء كاتولي بحال شي وحش عملاق صعيب تتغلب عليه. فهاد المقال، وجدنا ليكم بعض الأسلحة و الوسائل لي بيها تقدو تدافعو على راصكم ضد هاد الوحش لي ديما خارج لينا فالexams. نبداو على بركة الله.

أولا: العواصف الذهنية

اشاوا هاد العواصف عاود؟ اش دانا اسيدي لشي زوابع خلينا مهنيين الله يرضي عليك، راه ماقادين على صداع.

ماتخاف مادهش، زير معانا وغادي تفهم. طريقة العواصف الذهنية أو مايسطلح عليه بالإنجليزية  بالbrainstorming. عملية الزوبعة الذهنية، وكيما كيحيل الاسم ديالها، هي عملية فين كاتنزل على الورقة بوابل (زوينة هاد وابل عاود) من الأفكار. فهاد العملية كاتكتب اي حاجة جاتك على بالك بغض النظر واش مهمة او لا واش صالحة. المهم فهاد العملية هو تخرج أفكارك كاملة و تخرجها على شكل زوبعة من فوق الورقة. العملية تقدر تبان للبعض غير تخربيق و تضياع الوقت، بحق أهمية العملية تتجلى فكونها كاتسرح داك الإحتباس لي تيكون عدنا فدماغنا. ملي كاتخلص من الأفكار لي شادين ليك التفكير كاتخوي وكاتعطي بلاصة لأفكار جديدة تبان. المرة الجاية ملي تحصل قدام الورقة، زوبع الأفكار ديالك و حاول تدفع دماغك يفكر بزاف.

ثانيا: الكتابة الحرة

الكتابة الحرة أو ما يسطلح عليها ب الfree-writing هي وحدة من الطرق لي كاتستخدم بزاف فالإبداع الكتابي. بزاف ديال القصص العالمية بدات غا بالfree writing. لنفترض مثلا انه عندك موضوع على اشكالية الساعة الجديدة (GMT+1) و حصلتِ ماعرفتِ ماتسبق ولا توخر. شنو تدير فهاد الحالة؟ ترجع لور؟ تسمح فالإمتحان؟ تخلي الورقة خاوية؟ لا و ثم لا و ثم لا (فخاطر الخياري). فهاد الحالة غادي نبدا الكتابة ديالي بشكل حر، يعني غير غادي نطلقها تسرح. رخي العنان ليدك و ماتربطش افكارك و تيق بينا كيف الواد الجاري افكارك غادي تدفق و قبل ماتحس براسك غادي تلقا الورقة ديال الوسخ عامرة افكار لي ممكن من خلالها تلقا شي راس ديال الخيط لي يديك للطريق الصحيح ويحررك من لعنة الورقة البيضاء.

ثالثا:  المثالية أكبر عدو ليك

المثالية، أو داك الهاجس ديال كتابة كلشي صحيح و كلشي مقاد من الدقة الأولى هو لي كيخلي التطبيق ديال الافكار لي لفوق صعيب. راه تسمات ورقة الوساخ لسبب واحد: حيتاش كاتوسخ. ماتخافش توسخها، تمرمدها، أو حتى غاع تجرتلها. المهم هو تخرج فيها حَرْ افكارك. ماتقيدش راصك بالمثالية راه المثالية غير موجودة فالطبيعة.  لعنة الورقة البيضاء كاتغدا من هاد الهاجس وكاتخليك تحس بلي إيلا ماكتبتيش شي حاجة نيت تستحق الكتابة فراه ماكاين لاش توسخ الورقة.

نتمناو هاد النصائح يعاونوكوم شوية تتحررو من اللعنة و تكتبو مقالات و توسخو الأوراق بحرية.