How to prepare for the exam

كيفاش تحفض و توجد للإمتحان

شحال من مرة كاتقرى شي مقال أو نص وملي كاتسالي و كيسولك شي حد على شنو قريتي كاتشنج و كاتبقا تشوف فيه بحال إيلا عمرك قريتي شي حاجة. هاد القضية كاتوقع لينا كاملين. و السبب هو أنه دماغنا معزيزش عليه الفوضى. فملي كاتقرى شي حاجة بطريقة عشوائية- وخصوصا إيلا كان فيها بزاف ديال المعلومات- دماغنا ماكيبقاش قادر يعقل على شنو عطيتيه و كاتجيه أحسن يلوح داكشي ومايحفضوش. فهاد المقال انشوفو بعض الطرق أو الإستراتيجيات لي غاديا تعاونكم فالتذكر و الفهامة المزيانة ديال أي نص أو مقال صادفتوه.

الخطاطات و الجداول:

هادي شحال، كانو العلماء كيعتامدو على الجداول و الخطاطات باش يشرحو و يفسرو أي شيئ. ابن جزلة- عالم من بغداد- مثلا إستخدم الجداول باش يجمع معلومات على بعض الأمراض و الأعراض ديالهوم. كاين غاع علماء لي استخدمو الجداول فأشياء اخرى اعمق و أكثر تعقيدا؛ بحال مفاهيم رياضية و فيزيائية. الجداول عندهوم مكانة مقدسة عند جميع أهل العلم. هاد المكانة الرفيعة مايمكنش يكونو كسبوها إلا اذا كان فيهم شي حاجة مميزة. الإمتياز لي عند الجداول و الخطاطات هو كتالي: كيسهلو على الدماغ الفهم ديال الأشياء المعقدة. ملي كاتستخدم جدول باش تعبر على واحد المجموعة ديال الأفكار فراك بلا ماتحس كاتقوم بتمثيل دوك الأفكار بطريقة منطقية بحيث كيولي الجدول بحد ذاتو كيدل على كيفاش الأفكار مرتبطة و كيدل كذلك على العلاقات لي كاتجمع بين الأفكار. سواء كانو علاقات سببية، تقابلية، أو أي نوع اخر من العلاقات. الطبيعة باش الجداول أو الخطاطات كيتشكلو كاتخلي أي معلومة معقدة تبان بشكل مبسط وسهل الهضم. هاد التبسيط لي كيخلقو لينا الجدول و الخطاطة كيخلي دماغك دغيا يقبط المعلومة و يعقل عليها. السبب الثاني لي كايخلي الخطاطة تلسق

دغيا فدماغ الواحد هو الوقت لي كادوزو فالرسم ديالها. ونتا كاتخطط الخطاطة ديالك فراك بلى مانشعر كاتكون كاتراجع و كاتذاك. هاد النوع ديال اامذاكرة هو من احسن الانواع حيتاش تيكون فيه واحد النوع ديال الاستمتاع و التذوق ديال الخدمة شيء لي كيخليك تعقل على بزاف ديال المعلومات لي كنتي موحال تعقل عليهم بالطرق التقليدية المتعبة ديال المذاكرة.

الأسئلة:

وحدة من أهم الطرق ديال المذاكرة هي الأسئلة. شنو كانعنيو بالأسئلة؟ مزيان لي سولتي، أجي نوريك بواحد المثال... شي مرات، كاتكون كاتراجع لشي إمتحان أو شي فرض وكاتسائل مع راصك واحد السؤال محوري لي هو: علاش دبا أنا كانقرى غاع هادشي؟ شنو غادي ندير أنا بشي جيب تمام الزاوية ولا شي ضمائر؟ مزيان تسول بحال هاد الأسئلة و لكن لس مامزيانش هو تسولهوم و تحبس. الجواب ديال بحال هاد الأسئلة تيكون هو الهدف من ديك المادة لي راك كاتراجع فيها. مثلا ملي كاتكون كاتقرى grammar فراه الهدف هو تستعمل اللغة بطريقة صائبة. ممكن مايبانش ليكم الهدف من هاد القضية أو حتى الأهمية ديالها ولاكن على المدى البعيد، معرفة الأهداف من الدرس كاتخلي الواحد يراجع بجرعة زائدة من الmotivation حيتاش تيكون عارف بلي المعلومات لي راه كيحماق معاها دبا باش يفهمها، ماشي معلومات تافهة وإنما غادي تلعب دور مهم فالمستقبل ديالو بطريقة أو بأخرى. المراجعة فحد ذاتها عملية لي شوية مرهقة و كتطلب واحد شوية ديال الجهد. ايلا غابت من هاد العملية الmotivation ولو بجرعات قليلة، فراه ماكيبقاش بينها و بين العذاب حتى شي فرق. جرب المرة الجاية قبل ماتبدا المراجعة تجلس نتا و شي مجموعة من أصدقائك و حاولو تناقشو الأهداف علاش كانقراو ديك المادة و شنو أهميتها و لاحظو الفرق.

الكتابة:

ارنا دبا واحد النوع ديال الناس -الله يرد بيهم- شنو كيديرو. كيخليو تا كيقرب الإمتحان و كيقبطو الكتوبة ديالهم و كيشدو شي قنة و كيبقاو قرا يا ما تقرا...قرا يا ما تقرا....قرا يا ما تقرا...حتى كيحفيو عينهم و دماغاتهم. وفالاخير النتيجة وعكس المتوقع كتكون سلبية. عرفتي دبا شنو المشكل؟ المشكل هو أنه هاد الناس لي كيكتبو كيهملو أهم حاجة قلناها لحد الأن و لي هي الفكرة ديال ان الدماغ ايلا عطيتيه الروينة كيلوحها و يهني دماغو. القرائة بوحدها صعيييييييببيييييب يعتمد عليها الواحد للمراجعة. القرائة يالله تاتوصل المعلومة بالكشايف للذاكرة قصيرة المدى و غير كاتسد داك الكتاب -وفرمشة عين- كاتمسح ديك الذاكرة القصيرة المدى و كاتخليك نهار الإمتحان كادور فعينيك و كاتسالي الموسم الدراسي بالإستدراكية. خودها من عندنا نصيحة، الطريق ايلا الذاكرة طويلة المدى، كاتبدا من الكتابة. حرك القلم و خوي المداد و وسخ الورقة. ملي كاتكتب، دماغك كيدير عمليات معقدة لي كاتخليه يفهم و يinternalizi المعلومة و ماينساهاش دغيا. الكتابة كذلك كاتخليك تقدر ترجع فأي لحظة من الزمن و تطل عليها و تعاود تتذكر بزاف ديال الاشياء لي كان ممكن تنسى فمرة. شد داكشي لي راجعتي وحاول تكتبو أو تلخصو فمقالات صغيرة. منها كاتراجع شنو ذاكرتي و منها كاتوجد للكتابة مقال نهار الإمتحان. و نختمة بواحد المقطع من واحد الاغنية جزائرية زوينة:" الكتابة يا حكيم فالقرائة للعقيم" و السلام عليكم.

This article was originally written for EasyGlish as part of a series of articles called EasyKnowledge.