How to reconcile with books

مزال معدب مع هاد الإنجليزية آصاحبي، باقي مابغات تشد معاك الطريق نيشات خلاص. آ سيدي ما تمل ما تخاف ما دهش. هاحنا تاني و عاوتاني جينا بالحل فالصواني يا وقولو تبارك الله 🎵🎵.... احم! احم! سمحولينا...الشعبي عنـدنا فالدم... الغالب الله.

المفيد: فهاد الpost جبناليكم موضوع غادي يعاونكم تحسنو للغتك الإنجليزية بلا ماء....زعما بغينا نقولو تحسنو من مستواكم فالإنجليزية و تطورو من معارفكم اللغوية وتزيدو لقدام فسباقكم نحو الإحترافية و إتقان لغة العالم محبوبة الجماهير الإنجليزية. الروايات و الكتب، فايت قلنا ليكم راه خاصكوم تصاحبو و تصالحو معهم ياك؟ ايوا دبا جينا نشرحو ليكم بالتفاصيل المملة كيفاش تبنيو علاقات مع الكتب و الروايات.

اولا: قرا قدك يواتيك

آسيدي لا زربة على صلاح...نتا يالله بادي و يالله قلتي بسم الله فالإنجليزية اش داك لشي روايات معنكشة و كبيرة وتقيلة. اش داك لشي Shakespeare و لا Dickens .... قرا اخويا قدك يواتيك. هاد النوع ديال الكتاب لي دكرت دبا، غادي غير يكرهوك فالانجليزية و يطفيو فيك ديك الشميعة ديال الmotivation لي شاعلة لداخل كاتحفز فيك. ايلا باقي مبتدأ مافيها عيب تقرا قصص صغار مناسبين للمستوى المعرفي ديالك. كاين بزاف ديال القصص لي مكتوبة بطريقة سلسة و سهلة الهضم...بدا بيهم. اوحتى غاع ايلا زغبك الله و بغيتي تقرا الكلاسيكيات بحال Robin Hood أو Romeo and Juliet، قلب على نسخ مبسطة راه موجودة سواء فالانترنت على شكل PDFs أو فالمكتبات. كاين دور نشر لي كيعاودو يصوغو الكلاسيكيات بطرق مبسطة و سهلة الفهم.

ثانيا: لكتاب لي مافيه نفع...دفع

ملي تبدا القراية ديال شي كتيب و تحس براصك مامرتاحش ماحاسش بديك اللذة لوح عليك داك الكتاب. وحدة من اهم الشروط ديال reading for pleasure هي، و كيفما كيحيل العنوان براصو، pleasure. ايلا كاتقرا و بلاصة ماتحس بالراحة و الانتشاء كاتحس بالعذاب فراه داك الكتاب ماشي ليك. ماشي بالضرورة الكتب لي عجب محمد صاحبك غادي يعجبك تانتا/ي. و ماشي بالضرورة الكتاب لي عجب فاطمة الزهراء ايعجبك تانتا/ي الأدواق تاتختالف. كل واحد وشنو كيعجبو...ايلا مامرتاحش فالقراءة فراه ماغادي تستافد والو و بالعكس تقدر تمل غاع و تسمح فالقراءة كاملة بسبب كتاب واحد و لا رواية وحدة...ايوا لا هادي لا.

ثالثا: قلب و زيد قلب تايطيح الحك و يصيب غطاه

كل واحد فينا عندو ميول لواحد الحاجة معينة...كل واحد فينا كاتلقاه عزيز عليه نوع معين من الموسيقى...كل واحد فينا عندو مغني مفضل و أكلات مفضلة و زيد و زيد. نفس الشيئ بالنسبة للكتب. كاين بزاف ديال الgenres أو الأنواع الأدبية و كل واحد فينا فين كيلقا راحتو. مثلا كاين لي عزيز عليه الروايات البوليسة، فكتلقاه كيستمتع بكل سطر من روايات Sherlock Holmes المحقق الشهير. و كاين لي كيمووووووت على الحب و الغرام، فكتلقاه كيتذوق كل كلمة من الروايات الرومنسية. كاين فينا لي عزيز عليه الأشياء الواقعية، فكتلقاه منشوي مع شي كتاب فيه شي description واقعية لشي حدث أو شي مكان معين. نتا و نتي كقراء قلبو على شنو كيعجبكوم... فتشو على شنو كيطربكوم. و تيقو بيا ملي غادي تلقاو داك الgenre فين كاترتاحو ما باقيش غادي تقدو تحط الكتوبا من يديكوم.

حيتاش قريتي المقال كامل وصبرتي معانا ووصلتي حتى لهنا عدنا ليك هدية. موقع فيه بزاف ديال كتب مسموعة. الكتب المسموعة تقد ديرها فالهاتف ديالك و كل مرة تسمع شوية. باش حتى ايلا مالقيتيش الكتاب لي بغيتي على شكل نسخة ورقية و مافيك ماتعدب عويناتك بالPDF عليك غير بالaudiobooks. خلي لينا قلب اخضر 💚 فالcomments باش نعرفوك و نشكروك شخصيا.