How to take notes in university

كيفاش تدون ملاحظات الأستاذ خلال المحاضرة

وحدة من أهم مميزات الطالب المتفوق هي الطريقة باش كاياخد ال notes ديالو داخل الحصة. خلال المحاضرة، الأستاذ أو المحاضر كي قدم الدرس على شكل خطبة. نتا و نتي كطلبة، الدور ديالكم هي تاخدو من الأستاذ المعلومات لي تيخرج من فمو وتسجلوها عندكم باش من بعد تسترجعوها باش تذاكرو للامتحان بيها. لحد الآن مزيان...بحق الإشكال هو ماشي كلشي كيعرف ياخد الnotes فالقسم. ماشي كلشي كيقدر يسجل بالضبط شنو الأستاذ كيشرح. هادشي علاش، سيداتي سادتي، جبنا ليكم بعض الطرق الذكية لي غادي تعاونكوم بزاف فمسيرتكم الدراسية.

قيد غير المهم:

عنداك تمشي تسمع الnotes لي تيقول الاستاذ فالحصة مهمين وطيح على الكتاب ديالك تقيد الشادة و الفادة. راه ماشي المهم هي تقيد غاع داكشي لي تيقول الاستاذ، المهم هو تقيد غير داكشي المهم لي تيقول الأستاذ. عرفناك دختي فهادي، غير صبر معانا. هانتا شد معيا الحط، ملي الأستاذ ديالك كيشرح فالقسم فراه كيشرح و ماكيخلي ما كيقول. كاين الحوايج المهمين وكاين الحوايج لي غي زايدين و لا ماشي مهمين مقارنة مع اللب و الجوهر ديال الحصة. نتا و نتي خاصكون تكونو ذكيين وتديرو ما يسمى بالprioritization أو تسبيق الأشياء المهمة على الاشياء الثانوية. ركز مع الأستاذ وقيد غير الاشياء لي كاتبان ليك فعلا مهمة و فعلا تستاحق تتقيد. التفاصيل و الاشياء الثانوية كاتجي من بعد.

رتب و صنف:

ونتا كاتكتب حاول تلقا شي طريقة معينة باش ترتب افكارك. اخترع و بدع شي نظام معين خاص غير بيك نتا و لي غادي يسهل عليك الخدمة. مثلا حاول تخصص اقلام معينة و ألوان معينة لأشياء محددة. الأحمر للعناوين الكبيرة و الأشياء المهمة. الأخضر للsub-titles. تقدر غاع تزيد تخصص هاد التقسيم و تدخل اشياء كثيرة بحال ألوان خاصة بالأمثلة و ألوان خاصة بالتعريفات أو الdefinitions و وحدين اخرين خاصين غير للتعليقات الجانبية فالهامش ديال دفتارك. الحاجة الاخرى المهمة فهاد الباب ديال التصنيف و الترتيب، هي الoutlining او ترتيب الدرس على حساب معالم و تبويبات معينة. فينما تحس بالأستاذ داز من شق ل شق اخر بين هاد الإنتقال فالملاحظات لي خديتي فدفترك. قسم كلام الأستاذ لتبويبات و أقسام محدد. باش ملي ترجع تبغي تقلب على شي حاجة تلقاها دغيا وبلا تضياع الوقت، الجهد و الصبر.

ماتخافش من الاخطاء:

شوف باش نجيوك من الآخر، دوك الnotes ديالك؛ يعني تاشي واحد ما غادي يقدر يفهمهوم من غيرك. داكشي علاش ما خاصكش تخاف من دفتارك. كتب وخربق و زوق و جلخ ماكيهمش. المهم هو ملي ترجع لداك التجلاخ تقدر تقراه. ايلا قدرتي تفك شفرتو فراك مزيان. خدم بخطاطات وجداول. ماشي ضروري تبقا تكتب بحال شي فقيه كيكتب شي عقد ديال الزواج. الجداول راه من أكثر الإختراعات الunderrated و الغير المعترف بها و بقوتها. راه أي معلومة ممكن تقاد على شكل جدول مهما كانت صعيبة أو معقدة. نفس الشيئ حتى بالنسبة للخطاطات. خطاطة أو جدول واحد تقد تلخص العشرات ديال الكلمات و الأوراق ديال المعلومات بطريقة بسيطة وسلسة.

هادشي كامل قلناه، وكيما كيقول إدريس العراقي، غير باش تستهلك المحاضرات بلا ماتهلك لينا راصك. نتلاقاو فمقال جديد ودمتم سالميين.