How to write a descriptive essay

فالمقال لي داز تعرفنا جميع على كيفاش نكتبو مقال حجاجي وتعرفنا على جوج ديال الطرق لي من خلالهم نقدو نصممو و نبنيو مقالات مزيانة. فهاد الpost غادي نركزو على نوع آخر من المقالات. النوع و باختصار هو المقالات الوصفية او الdescriptive essays. هاد النوع مختلف شوية على النوع السابق. الإختلاف بطبيعة الحال كاين فطريقة البناء ديال المقال.

وصف الأماكن:

من الأشياء لي ممكن تتطلب منك كطالب او كشخص مهتم بالإنجليزية هي توصف شي مكان معين أو شي بلاصة من البلايص. كل بلاصة عندها مميزات و أشياء لي كاتخليها مختالفة على أماكن اخرى شي لي غادي يخلي المقالات الوصفية تختلف من مكان لأخر. بحق غاع البلايص عندها بعض الأشياء المشتركة لي ممكن نستغلوها حنا باش نقادو واحد التصميم لي يكون جامع و شامل. في ما يلي مثال ديال تصميم لي ممكن ينفع فالكتابة ديال مقال وصفي:

التصميم - outline:

المقدمة و الخاتمة: كيف ما كانقولو ديما هاد الجوج ديالك، نتا مولاهوم؛ لعب فيهم كيما بغيتي. عطي تعريف بسيط للمكان لي باغي توصف... أو هضر على التاريخ ديالو....يمكن ليك غاع تعاود شي قصة قصيرة متعلقة بداك المكان. المهم قدم للقارئ معلومات عندها علاقة بالمكان بطريقة زوينة تثير الانتباه.

العرض: العرض و كيف ما كانعرفو جميع غالبا كيتكون من ثلاثة ديال الفقرات و كل فقرة كاتكون كادور على فكرة وحدة أساسية و أمثلة او إستدلالات او توسعات (راجع المقال الأول فالسلسة). حنا لي كيهمنا هو الوصف. الوصف كاين بزاف ديال الطرق باش نقدو نكتبوه. نذكرو هنايا بعضها. أول طريقة للوصف لي تقدرو تخدمو بيها هي من العام للخاص. تخايلو معايا شي camera شادة شي لقطة...اللقطة فالأول كاتبين لينا مشهد كبير و عام. الصورة قدامنا فيها شي منظر من المناظر مشدود كامل...مع المدة، الcamera ديالنا كاتزيد تقرب أكثر فأكثر و كاتضيق الزاوية ديال المشهد شوية بشوية حتا كاتركز على شي حاجة صغيرة وسط المشهد. هاد القضية بالضبط هي لي غادي نديرو تاحنا فالوصف ديالنا. غادي نبداو بوصف المشهد من على برا...اي بدون تفاصيل. و مع تقدُم المقال، غادي نديقو الزاوية ديال الوصف و نركزو على التفاصيل أكثر. الطريقة الثانية هي نديرو العكس. أي نبداو بوصف الخاص و ندوزو للعام. الفرق مابين هاد جوج طرق كيبقا فرق ديال أذواق و كيفاش الكاتب كيتخيل المقال و الزاوية منين باغي يصورو.

وصف الأشخاص:

وصف الأشخاص كيختالف شوية على وصف الأماكن. الفرق كيبان أكثر فالبنية ديال المقال. فكيف ماشفنا لفوق وصف الأماكن كيعتامد على الperspective و الزاوية ديال الرؤية لي باغي الكانب يركز عليها. بينما الأشخاص الfocus كيكون على أشياء أخرى. ندوزو للتطبيقي باش يبان لينا الخيط:

العرض: حاول تقسم الوصف ديالك لعدة تقسيمات أو لأبواب مختلفة. مثلا ممكن تعتمد على التقسيم التالي باش توصف شي شخص: باب في الوصف الجسماني، باب فوصف الجانب النفسي، و باب فوصف جانب المعاملات. بهاد التقسيم غادي تكون غطيت تلاثة ديال الجوانب فالشخص لي باغيين توصفو. ممكن كذلك توصفو من خلال التركيز على تلاتة ديال الأشياء المحددة. مثلا كل فقرة تهضر فيها على شي خصلة من الخصال لي كاينة فهاد الشخص.

الوصف بطبيعتو صعيب يكون محايد. غالبا و نتا كاتوصف شي حاجة أو شي شخص غادي تعطي رأيك فيه بطريقة أو بأخرى. هادشي علاش خاصكوم تردو البال و تحاولو ما أمكن تلجمو مشاعركم و ماتخليوهاش تسيطر على الprocess ديال الكتابة. حاولو تكونو محايدين فالوصف ما أمكن، إلا إذا تطلب منكم تعطيو رأيكم.

This article was originally written for EasyGlish as part of a series of articles called EasyKnowledge.