How to write an academic article

كيفاش تكتب مقال اكاديمي فاللغة الانجليزية؟

المقالات الاكاديمية وحدة من اهم الاشياء لي غادي يخصك تضبط مزيان ايلا كنتي ناوي تمشي مزيان فالمجال ديال الدراسات الإنجليزية. بلا شك غادي تكونو لاحظتو الأهمية ديال الكتابة و التعبير المقالي فالكلية. فهاد المقال غادي نتعرفو جميع على بعض الtips and tricks  او كيما كانقولو ليهم في الدارجة ديالنا العزيزة: القوالب.

اولا، ماتكتبش

ايوا ها الروينة بدات؛ طلع تكتب مقال نزل شكون قالها ليك. متعصبوش و صبرو معيا و كيما قالت لالة نزهة الرغراغي فمسلسل من دار لدار "ركزو معايا وعطيوني عقلكوم". اول حاجة خاصكوم ديرو ملي يتحط قدامكون واحد الموضوع مقالي هي تقراوه مزيان...واخا هادي باينة و من بعد. من بعد آ سيدي و آ لالة غادي تقادو ما يسمى بالoutline. ها دبا بدات القضية كاتزيان. الoutline اسيادي هو بحال واحد التصميم صغير ديال الحوابج لي غادي يكونو عندك فالمقال ديالك. مثلا ناخدو شي موضوع و نطبقو عليه هاد القضية ديال الoutline. اش بان ليكم فالساعة الجديدة/القديمة لي دايرا لينا الشقيقة هاد الأيام، مزيانا كموضوع نكتبو عليه؟ اذا على بركة الله:

الموضوع : المغرب و الساعة الصيفية

المقدمة:

الفكرة باش غادي تبدا.

العرض:

-النقطة الأولى عليمن غادي تهضر + الأمثلة أو الأدلة لي غادي تعطي

- النقطة الثانية + الأمثلة أو الأدلة لي غادي تعطي

- ‏النقطة الثالثة + الأمثلة أو الأدلة لي غادي تعطي

الخاتمة:

الفكرة باش غادي تختم.

هاد الoutline  لي لفوق هو التصميم علاياش غادي تبني المقال ديالك. فكر فيه بحال الهيكل العضمي لموضوعك.  فيه غادي تحدد بالضبط الاشياء عليمن غادي تهضر  و فيه غادي تجمع و ت brainstorm-i الافكار لي غادي تعمر بيهم مقالك. هاد الخطوة خاص تاخد ليك ربع الوقت لي عندك.

ثانيا، كتب

هاد المرحلة هي المرحلة ديال الكتابة الفعلية. هنا فين كتوْلد الأفكار من والو أو كادير ما يسمى بالthought generation. العملية ديال تَولِيد الافكار من اصعب الأشياء لي ممكن لواحد يدير وهي السبب الرئيسي لي كيخلي العديد ديال الناس يتشنج قدام الورقة نهار الإمتحان. بشوية ديال الممارسة و الانضباط ممكن تكتب على اي موضوع كيما بغا يكون..يكفي فقط تكون عندك بيه دراية مسبقة. حيتاش نتوما عزاز علينا جبنا ليكم واحد الtip لي غادي تعاونكوم بزاف فالعملية ديال توليد الأفكار...المرة الجاية لي تلقاو راصكوم حاصلين قدام شي موضوع و مقديتوش تكتبو عليه جربو هاد القضية و ردو علينا الخبار. القضية ومافيها هي انه باش تولد الأفكار على أي موضوع خاصك تسول بزااااااااااف ديال الأسئلة. مثلا، باش تكتبو على موضوع المغرب و الساعة الصيفية، تقدو تسولو راصكوم الأسئلة التالية:

- شنو المشكل بالضبط؟

- ‏ايمتا بدا النقاش على هاذ الموضوع؟

- ‏شنو الجديد فهاد الموضوع؟

- ‏شنو قالو الناس فهاد الموضوع؟

هاد النوع ديال الأسئلة أو ما يسمى بالأسئلة الصحافية مهم فمرحلة تولِيد الأفكار حيتاش كيخليك تفكر فبزاف ديال الحوايج لي تقدر تكتب عليهم و كيهرس ديك القفص الوهمي لي كيخليك مشنج قدام الورقة. هاد الطريقة كان كايستخدمها أرسطو شحال هادي و كانت كاتعاونو باش يولد افكار جديدة على مواضيع مختلفة. هاد المرحلة خاص تاخد ليك النص ديال الوقت المحدد للكتابة.

ثالثا، راجع

آخر مرحلة فالكتابة ديال المواضيع المقالية هي المراجعة. ضروري و مأكد انك تراجع شنو كتبتي. النسخة الأولى من المقال كاتكون غالبا خام و عامرة أخطاء. كيخص ديما ترجع تقراها باش تنقيها من الشوائب و تحسنها باش فالاخير تكون كاملة مكمولة. ماتخافش فهاد المرحلة من انك تزيد و تنقص ايلا بان ليك شي ما تزيد او شي ما تنقص. ماتخافش انك تغير شي فكرة أو تدير ليها إعادة الصياغة.