How to write an argumentative essay

المقال لي داز تعرفنا فيه جميع على كيفية كتابة موضوع مقالي بصفة عامة. وهضرنا على مختلف المراحل لي كتميز هاد العملية ديال الكتابة و التعبير. المهم و بإختصار، فهاد المقال غادي ندوزو من العام للخاص و غادي نهضرو على كيفية كتابة نوع محدد من المقالات. النوع لي غادي ندويو عليه هو المقالات الجدلية أو ما يسمى بالإنجليزية الargumentative essays. فهاذ المقال غادي نشوفو جوج ديال الطرق ديال الكتابة ديال هاذ النوع المقالي.

التصميم الأول: الدفاع أحسن طريقة للهجوم

فهاد الطريقة، و كيف ما غادي تكونو شفتو من العنوان، فيها تركيز على الدفاع أكثر من الهجوم. الدفاع و الهجوم فهاد المقال انفسروهوم كتالي:

• الدفاع: الدفاع على الأطروحة ديالك و لي نتا مؤمن بالصحة ديالها.

• الهجوم: الهجوم على الأطروحة النقيض لي كاتقول العكس ديال داكشي لي نتا كاتعتقد انه صحيح.

فالطريقة الأولى غادي نعتامدو بشكل كبير على الدفاع بحيت التصميم ديال المقال ديالنا غادي يكون كيقدم أدلة لي كادافع على أطروحتنا. كيف العادة، المقال غادي يتقسم على خمسة ديال الفقرات؛ مقدمة، ثلاتة ديال الفقرات أساسية، وخاتمة. المقدمة و الخاتمة ديما و فغاع الessays تيدارو بنفس الطريقة (رجع للمواضيع السابقة باش تفهم). لي كيهمنا حنا هو العرض و الفقرات لي فيه.

الفقرة الأولى:

فهاد الفقرة كاتعطي أقل دليل عندك و أضعف حجة فالحجج ديالك. هاد الفقرة، واخا مهمة، قليل فين كيعقل عليها الواحد/المصحح. هادشي علاش من الأحسن ماتضيعش فيها الحجج القوية ديالك و عمرها بأضعف وحدة عندك. الحجة خاص تعززها بأمثلة. و خير الأمثلة هما لي كاتكون كاتوفر فيهم وحدة أو بزاف من الأشياء التالية:

- إحصائيات و أرقام

- ‏مقولات أو quotes ديال شخصيات وازنة فالمجال

- ‏معلومات علمية

- ‏معلومات ناتجة من تجارب داروها ناس فنفس المجال

الفقرة الثانية:

نفس المخطط لي تبعتي فالفقرة الأولى غادي تعاودو هنايا غير هو غادي تعلي شوية من الحدة ديال الحجج ديالك و حاول تخلي لي كيقرا ليك يبقا منتبه معاك و حاضي شنو كيقرا و مركز. هادو بعض التحراميات او الtips لي يقدرو يعاونوك تشد الإنتباه ديال القارئ ديالك:

- خدم بزاف ديال الattention grabbers

- لخص الفقرات لي فاتو فجمل قصيرة ساهلة التذكر

- ‏استخدم أدوات الربط لي كاتبين العلاقات بين الجمل و كاتسهل فهم ترابط الأفكار.

الفقرة الثالثة:

هادي هي أهم فقرة فالمقال ديالك. و السبب هو انه هاد الفقرة غالبا كتلسق فالذهن ديال القارئ/ المصحح ديالك و بيها كَيْكون فكرة على مقالك ومنها كي خرج بتقيِيم و تنقييط للمقال ديالك. داكشي علاش فهاد الفقرة خاصك تحط غاع الأوراق ديالك و تسرفق القارئ بالورقة الرابحة ديالك. أهم حجة هنا خاصها تبان و هنا فين خاصك تفنن فالإقناع و تبدع فالبنية الحجاجية ديالك.

التصميم الثاني: دقة فيا دقة فيك

هاد التصميم أو هاد الoutline فيه نفس الخطوات و الأساليب لي استعملناها فالتصميم الأول. الفرق الوحيد هو هاد المرة بلاصت ما غادي ندافعو على الأطروحة ديالنا، غادي نهجمو على الأطروحة النقيض و نحاولو نضحضوها بالأدلة و بإتباع نفس المنهجية لي استخدمنا لفوق.

ترقبو المزيد من المقالات على كيفية كتابة أنواع و اجناس أخرى فالمستقبل القريب.