Embedded Files
اللغة هي الحاوية ديال الثقافة. هاد الجملة فيها ما فيها من الدلالات و الإمكانيات. ملي كانقررو نتعلمو للغة الإنجليزية و حدة من الدلالات ديال هاد الجملة لي قلنا فالأول كاتبان. اينا ثقافة لي خاص نتعلمو بها الإنجليزية؟ الثقافة الأمريكية؟ أو الثقافة البريطانية؟ و علاش غاع خاصنا نتعلمو اللغة و ثقافتها؟ علاش مفروض عليا نتعلم ثقافة غربية ماشي ديالي؟ هاد الأسئلة و اكثر غادي نحاولو جميع نتعرفو عليها فالمقال التالي.
اللغة و الثقافة جوج من الأشياء لي كتبو عليهوم الناس بزاف و فصلو فيهم. الخلاصة و العصارة ديال داكشي لي توصلو ليه هو هادا: اللغة و الثقافة جوج ديال الخوت لي مستحيل تفرق بيناتهوم.
يعني، باش تتعلم لشي لغة لازم و مؤكد تنغمس و تتمرمغ فالثقافة ديالها و تحس باش كيحسو مالين اللغة. دبا فالإنجليزية عدنا على الاقل جوج ديال الثقافات، الأمريكية و البريطانية؟ فإينا وحدة خاصك تختار؟ فالحقيقة هاد السؤال ماعندو جواب أو بالأحرى الجواب ديالو غادي يختلف من شخص لأخر. ممكن تختار اي وحدة و تتعلم للغتها منغامسا فثقافتها. غير هو ايلا سولتينا حنا، غادي نقولو ليك تعلم الثقافة الأمريكية حسن ليك.
هاد القضية كانبان فشكل، و كيبان بحال ايلا فيها شوية ديال الإنحياز لتقافات غربية، ولكن راها واقع ماكاينش منو لهروب. ايلا فعلا باغي تتعلم للغة ديال بصح و تويلي بحال شي native فعليك بالثقافة و خصوصا الثقافة الشعبية (الأفلام، المسلسلات، الأغاني، العادات و التقاليد....)؛ ايلا جاتك هاد القضية مامزياناش و فيها شي ريحة ديال التطبيع، ممكن ماديرهاش بحق لغتك الإنجليزية غادا تبقا ديما يتيمة و ماعندها أصل خصوصا ماحدها مزال ماحاضراش هنا فالمغرب بقوة. نهار تكون الآنجليزية عندها حضور صحيح ممكن ديك الساعة نستغنيو على الثقافات الغربية و نرضو الإنجليزية جزء لا يتجزء من ثقافتنا المغربية.
هاد القضية ديال الإنجليزية تولي جزء من الثقافة ديالنا ماشي شي حاجة مستحيلة. خاص غير شوية ديال الإصرار. اللغة الإنجليزية حاليا عندها هاد الخاصية. و خير مثال هو الهند و مصر. الهند مثلا استطعت تخلي اللغة الإنجليزية جزء من ثقافتها بل قدرات تربط اللغة بتقافتها المحلية الشيئ لي دار قطيعة مع ثقافة المستعمر و الثقافة البريطانية وخلا الهند تطور لغة انجليزية خاص بهم بعيدة كل البعد عن الثقافة البريطانية.
This article was originally written for EasyGlish as part of a series of articles called EasyKnowledge.
Google Sites
Report abuse